學位論文
Permanent URI for this collectionhttp://rportal.lib.ntnu.edu.tw/handle/20.500.12235/73882
Browse
1 results
Search Results
Item 以電腦輔助出題的台語詞彙測驗研究佮語法接觸調查(2021) 林佳怡; Lim, Ka-I因為歷史佮政治因素，多數台灣人以華語做第一語言。台灣各語言的發展無平等，親像其他的本土語言，台語的資源相對較欠缺，而且受著強勢華語的影響，台語當咧發生變化，沓沓仔倚向華語，甚至可能會影響台語測驗的標準。為著拓展台語測驗的發展面向，以及了解語法變化對台語標準化可能產生的影響，本文進行三項研究。第一，建立一套自動出題的方法佮程序，產出選項是漢字佮羅馬字兩種題型的詞彙測驗。以台語現有的資料庫做基礎，利用電腦程式自動產生詞彙測驗選擇題的題身佮選項，產出的題目由人工略仔修改了，以線頂的方式實際施測。第二，驗證出題方法的可用性，閣分析試題的難度特徵。收集作答反應以後，以古典測驗理論（CTT）佮試題反應理論（IRT）的Rasch model方法分析，來驗證試題可用性，才閣進一步共兩種題型中會影響難度的試題特徵揣出來。結果發現，本研究設計的出題方法佮程序，確實會當產出有鑑別度、也符合測驗單向度要求的可用試題。難度特徵方面，漢字選項題型的各種客觀特徵，攏較輸專家主觀判斷的結果；羅馬字選項題型有「題目台語特色詞的數量」、「誘答選項佮正答選項的聲調差異數量」兩項客觀特徵會當預測難度，專家判斷顛倒無準確。第三項研究轉向關注可能影響測驗標準的語法變化。整理受華語影響的台語語法，設計做語法接受度量表，kap入去研究一的線頂測驗，利用測驗的形式做語言調查的替代方案，來評估台語語法受華語影響的情形。結果發現，台語語序佮華語無仝的語法特色，受影響的程度較低，語序仝款、語法詞無仝的語法特色，受影響的程度較懸，甚至有錯誤語法的接受度比正確語法的接受度較懸的例。本研究的成果，開創台語測驗自動命題的研究，會當以較低的成本增加台語語言能力認證考試的題目數量，也會當予一般大眾初步判斷家己的程度適合報佗一个等級的考卷；另外，因應中學階段本土語納入必修課，研究成果也會當發展做教師判斷學生台語程度的工具。